အိုမီခရွန်လူနာ ၆၃ ဦးတွေ့ရှိပြီးနောက် Test and Go စနစ်ဖြင့်ပြည်ဝင်ခွင့်ကိုပြန်လည်ရုပ်သိမ်းရန် ထိုင်းအစိုးရပြင်ဆင်နေသည်ဟု ထိုင်းကျန်းမာရေးဝန်ကြီး ဆို။
ထိုင်းနိုင်ငံတွင် အိုမီခရွန်ပိုးရှိလူနာ ၆၃ ဦးတွေ့ရှိရပြီး နောက်ထပ်အတည်ပြုရန် ၂၀ ဦးကျန်ရှိနေသည်ဟု ထိုင်း ဒုဝန်ကြီးနှင့်ကျန်းမာရေးဝန်ကြီး အနုထင် ချန်ဝီရကွန်ကအတည်ပြုပြောကြားထားပြီး ကွာရန်တင်း ဝင်ရန်မလိုဘဲ Test and Go စနစ်ဖြင့်ပြည်ဝင်ခွင့်ပေးထားခြင်းကို ပြန်လည်ရုပ်သိမ်းရန်တွက် ကိုဗစ်-၁၉ ဗဟိုဌာနထံ အဆိုပြုသွားမည်ဟု ဆိုသည်။
ထိုင်းနိုင်ငံတွင် အိုမီခရွန်မျိုးကွဲ ကိုဗစ်-၁၉ လူနာဦးရေတဖြည်းဖြည်းမြင့်တာလာပြီးနောက် ကွာရန်တင်းဝင်ရန်မလိုဘဲ Test and Go စနစ်ဖြင့်ပြည်ဝင်ခွင့်ပေးထားခြင်းကို ပြန်လည်ရုပ်သိမ်းရန် ယနေ့မနက်တွင်ကျင်းပခဲ့သည့် ကျန်းမာရေးဝန်ကြီးဌာန EOC အစည်းအဝေးတွင်ဆုံးဖြတ်ခဲ့ပြီး ထိုင်းနိုင်ငံကိုဗစ်-၁၉ ကူးစက်ပျံ့နှံ့မှုအခြေအနေစီမံအုပ်ချုပ်ရေးဗဟိုဌာန (CCSA) ထံ အဆိုပြုတင်ပြပြီးသဘောထားမှတ်ချက် ရယူသွားမည်ဟု ဝန်ကြီးကဆိုသည်။
ထိုင်းနိုင်ငံတွင် အိုမီခရွန်မျိုးကွဲလူနာဦးရေနှင့်ပတ်သက်သောအသေးစိတ်အချက်အလက်များ၊ အိုမီခရွန်စောင့်ကြည့်ခြင်းဆိုင်ရာမူဝါဒနှင့်ပတ်သက်ပြီး ယနေ့တွင် ထိုင်းကုသရေးသိပ္ပံဦးစီးဌာနမှသတင်းစာရှင်းလင်းပွဲပြုလုပ်သွားမည်ဟု ဆိုသည်။
သတင်း ရွှေကရင် (ရာမညမြေ)
