ထိုင်းနိုင်ငံ တာ့ခ်ခရိုင်၊ ဝမ်ကျောက်မြို့နယ်၊ နာဘော့ရွာတွင် ပွဲစားစွန့်ပစ်ထားတဲ့ မြန်မာ ၉၁ ဦးကို ထိုင်းအာဏာပိုင်တွေက ယနေ့ ဇန်နဝါရီလ ၃၁ ရက် တွင် တွေ့ရှိခဲ့ပါတယ်။ ထိုင်းအာဏာပိုင်တွေ ရောက်ရှိလာချိန်မှာတော့ စွန့်ပစ်ခံထားရတာ ၁၅ ရက်လောက်ရှိပြီဖြစ်တဲ့အတွက် သူတို့တွေဟာ ငိုပြီး အကူအညီတောင်းခံခဲ့ကြတယ်လို့ သတင်းမှာ ဖေါ်ပြထားပါတယ်။
ဖမ်းဆီးရမိတဲ့ မြန်မာနိုင်ငံသား ကျား ၄၃ ဦး၊ မ ၄၈ ဦးတို့ကို မေးမြန်းကြည့်တဲ့အခါ သူတို့ဟာ ထိုင်းကို လာဖို့အတွက် ပွဲစားကို တစ်ဦးလျင် ဘတ် ၂၅,၀၀၀ – ၃၉,၀၀၀ ထိပေးခဲ့ရတယ်လို့ဆိုပါတယ်။ ပွဲစားဟာ သူတို့ကို လမ်းပြဖြင့် သောင်းရင်းမြစ်ကနေ ထိုင်းဘက်ခြမ်းထိ ခေါ်လာပြီး အဆိုပါခြံထဲရောက်တဲ့အချိန် စွန့်ပစ်ထားခဲ့တာ ဖြစ်ပါတယ်။ စွန့်ပစ်ခံခဲ့ရတဲ့ ၁၅ ရက်အတွင်းမှာ ပါလာတဲ့ ခေါက်ဆွဲခြောက်ထုပ်တွေကိုသာ ဝေမျှပြီး စားသောက်ခဲ့ရတယ်လို့ အဲဒီထဲကတစ်ဦးကဆိုပါတယ်။
ထိုင်းအာဏာပိုင်တွေဝင်ရောက်ဖမ်းဆီးခဲ့ချိန် ၉၁ ဦးလုံးဟာ ကြောက်ရွံ့နေတယ်လို့ ဆိုပါတယ်။ လက်ရှိမှာတော့ တာ့ခ်ခရိုင်ရဲစခန်းတွင် သူတို့အားလုံးကို အစေားအသောက်များစီမံထားပေးကာ နေရပ်ပို့ဆောင်ရေးအစီအစဉ်ကို ဆက်လက်လုပ်ဆောင်သွားမှာဖြစ်တယ်လို့ရဲမှုးကဆိုပါတယ်။
