30 May 2024

,

ဒီဇင်ဘာလမှာကျင်းပမယ့် ၂၀၂၀ ဆူဇူကီးပြိုင်ပွဲအတွက် ပြင်ဆင်နေတဲ့မြန်မာ့လက်ရွေးစင်အသင်းခြေစမ်းပွဲ တာထွက်လှ။

လာမယ့်ဒီဇင်ဘာ ၅ ရက်နေ့ကနေ ဇန်နဝါရီ ၁ ရက်နေ့အထိ စင်ကာပူနိုင်ငံကအိမ်ရှင်အဖြစ်လက်ခံကျင်းပမယ့် ၂၀၂၀ ဆူဇူကီးဖလားပြိုင်ပွဲအတွက် တူရကီနိုင်ငံမှာ စခန်းသွင်းလေ့ကျင့်နေတဲ့မြန်မာ့လက်ရွေးစင်အသင်းဟာ နိုင်ပွဲနဲ့အတူခြေစမ်းပွဲတာထွက်လှခဲ့ပါတယ်။

ယမန်နေ့ ဒေသစံတော်ချိန် မွန်းလွဲ ၂း၃၀ နာရီအချိန်မှာ တူရကီ Amateur League ကလပ် Manavgat Belediyespor အသင်းနဲ့ခြေစမ်းပွဲကစားရာမှာ (၂-၁) ဂိုးနဲ့အနိုင်ရရှိခဲ့ပါတယ်။

မြန်မာအသင်းအတွက်အနိုင်ဂိုးကို လူငယ်တိုက်စစ်မှူး ဝင်းနိုင်ထွန်းက ပွဲချိန် ၄၁ မိနစ်မှာသွင်းယူပေးနိုင်ခဲ့ပြီး ဒုတိယဦးဆောင်ဂိုးကို ကွင်းလယ်ကစားသမားမောင်မောင်လွင်က ပွဲကစားချိန် ၆၅ မိနစ်မှာ သွင်းယူခဲ့ပါတယ်။

ဆက်လက်ပြီး ဒုတိယပိုင်းပွဲကစားချိန် ၇၅ မိနစ်မှာ အိမ်ရှင်အသင်းကချေပဂိုးသွင်းယူနိုင်ခဲ့ပါတယ်။

ဂျာမန်နည်းပြ အန်တို နီဟေးဦးဆောင်တဲ့ မြန်မာ့ပမာဏလက်ရွေးစင်အသင်းဟာ ပထမပိုင်းမှာ ဂိုး-မျိုးမင်းလတ်၊ နောက်တန်း- အောင်ဝဏ္ဏစိုး၊ ရဲမင်းသူ၊ ဝင်းမိုးကျော်၊ ဟိန်းဖြိုးဝင်း၊ အလယ်တန်း- မောင်မောင်ဝင်း၊ နေမိုးနိုင်၊ အောင်နိုင်ဝင်း၊မြတ်ကောင်းခန့်၊ မျိုးကိုထွန်း၊ ရှေ့တန်း- ဝင်းနိုင်ထွန်းတို့နဲ့ပွဲထွက်ကစားခဲ့ပါတယ်။

ဒုတိယပိုင်းမှာတော့ ဂိုး- စိုးအာကာ၊ နောက်တန်း- ဒေးဗစ်ထန်၊ ငြိမ်းချမ်း၊ ဇော်ရဲထွန်း၊ ဝင်းမိုးကျော်၊ အလယ်တန်း- လှိုင်းဘိုဘို၊ လွင်မိုးအောင်၊ ထက်ဖြိုးဝေ၊ မောင်မောင်လွင်၊ ရှေ့တန်း- သန်းပိုင် တို့ဖြင့် လူအပြောင်းအလဲပြုလုပ်ကာ ပွဲထွကခဲ့ပါတယ်။

တူရကီနိုင်ငံမှာလေ့ကျင့်နေစဉ်ကာလအတွင်းမှာ အာဖရိကအသင်းတစ်သင်းဖြစ်တဲ့ ဘူရန်ဒီလက်ရွေးစင်အသင်းနဲ့လည်ကောင်း၊ တူရကီနိုင်ငံကိုလာရောက်လေ့ကျင့်နေတဲ့ ဒေသတွင်းပြိုင်ဘက် အင်ဒိုနီးရှားအသင်းနဲ့လည်ကောင်း နိုင်ငံတကာ (A) အဆင့်ရှိတဲ့ ခြေစမ်းပွဲတွေကို ဆက်လက်ယှဉ်ပြိုင်ကစားသွားမှာ ဖြစ်ပါတယ်။

မလေးရှားလိဂ်မှာကစားနေတဲ့ တိုက်စစ်မှူးအောင်ကောင်းမာန်အနေနဲ့ ရက်အနည်းငယ်အတွင်းမှာ တူရကီနိုင်ငံကိုရောက်ရှိလာမှာဖြစ်ပြီး ဟိန်းထက်အောင်ကတော့ ဆူဇူကီးပြိုင်ပွဲမတိုင်မီ လက်ရွေးစင်အသင်းနဲ့ပူးပေါင်းလေ့ကျင့်သွားမှာ ဖြစ်ပါတယ်။

သတင်း ဝမ်းဇီး

SHARE THIS NEWS

OTHER NEWS