နိုဝင်ဘာလ ၂၅ ရက်နေ့တွင် ယှဉ်ပြိုင်ကစားခဲ့သည့် မြန်မာ့လက်ရွေးစင်အသင်းနှင့်အင်ဒိုနီးရှားအသင်းတို့၏ ခြေစမ်းပွဲတွင်ကြိုတင်ပေါက်ကြားသည့် ရလဒ်အတိုင်း ၄-၁ ဂိုးဖြင့်ရလဒ် ထွက်ပေါ်။
မြန်မာ့လက်ရွေးစင် ဘောလုံးအသင်းနှင့် အင်ဒိုနီးရှာ လက်ရွေးစင်အသင်းတို့ တူရကီနိုင်ငံတွင် ခြေစမ်းပွဲ ကစားကြရာ ရလဒ်မှာ ကြိုတင်ပေါက်ကြားထားသည့်အတိုင်း ၄-၁ ဂိုးရလဒ်ဖြင့် ပွဲပြီးဆုံးခဲ့သည်။
ပြီးခဲ့သည့် နိုဝင်ဘာလ ၂၅ရက် မြန်မာအချိန် ည ၉နာရီတွင်ယှဉ်ပြိုင်ကစားခြင်းဖြစ်ပြီး ပွဲမစမှီကပင် အင်ဒိုနီးရှားအသင်းက ၄-၁ဂိုးဖြင့် အနိုင်ရမည်ကို ကြိုတင်သတင်းထွက်နေကြောင်း မြန်မာဘောလုံးအသင်းနှင့် နီးစပ်သူ တစ်ဦးကပြောသည်။
အင်ဒိုနီးရှားအသင်းမှာ ပထမပိုင်းတွင် မြန်မာအသင်းကို ၃ဂိုးပြတ်နိုင်နေပြီး ဒုတိယပိုင်းတွင် တဖက်တဂိုးစီ ထပ်မံသွင်းယူကာ ၄-၁ ဂိုးဖြင့် ပွဲပြီးသွားခြင်းဖြစ်သည်။
“၂-၀ ဂိုးဖြစ်နေကတည်းက ကျွန်တော့်မိတ်ဆွေကပြောတယ်။ ဒီပွဲက ၄-၁နဲ့ ပြီးမှာတဲ့။ ကျွန်တော်မယုံဘူး။ တကယ်ပဲ ၄-၁နဲ့ပြီးသွားတယ်” ဟု အမည်မဖော်လိုသူ သတင်း ရင်းမြစ်တစ်ဦးကပြောသည်။
အရှေ့တောင်အာရှ ဘောလုံးလောကတွင် ဂိုးရလဒ်အတိအကျခန့်မှန်းသည့် လုပ်ပွဲကစားခြင်းမှာ တွင်ကျယ်လေ့ရှိပြီး ယင်းလုပ်ပွဲထဲတွင် လက်ရွေးစင်အသင်းများလည်း ပါဝင်ကြောင်း အဆိုပါ သတင်းရင်းမြစ်ကပြောသည်။
မြန်မာနိုင်ငံဘောလုံးလောကတွင် ရာထူးကြီးတာဝန်ယူသူတစ်ဦးမှာ နာမည်ကြီး လောင်းကစားလောကသားတစ်ဦး ဖြစ်ပြီး မြန်မာနိုင်ငံတွင် အသုံးများသည့် အွန်လိုင်းလောင်းကစားဝက်ဘ်ဆိုဒ် ibet789 ကို ချုပ်ကိုင်ထားသူတစ်ဦး ဖြစ်သည်။
သတင်း ဝမ်းဇီး
